The New Testament in Scots was
translated by William Lorimer, scholar and Dundonian.
Matthew 20.17
When Jesus wis gaein doun tae Jerusalem, he tuik the Twal awa frae the lave an said til them, as they
gaed alang, 'Listen, we ar on our road doun tae Jerusalem; and there the Son o Man will ge
gien up tae the Heid-Priests an Doctors o the Law, an they will duim him tae deith an haund
him owre tae the haithen tae be jamphed an leashed an crucified: but on the third day he will
rise again.'
Matthew's Gospel Ch 1 vs 18 - 23
This is the storie o the birth o Jesus Christ. His mither Mary wis trystit til Joseph, but afore they war mairriet she was
fund tae be wi bairn bi the Halie Spirit. Her trystit husband Joseph, honest man, hed nae mind tae affront her afore the warld an wis
for brakkin aff their tryst hidlinweys; an sae he wis een ettlin tae dae, whan an angel o the Lord kythed til him
in a draim an said til him, 'Joseph, son o Dauvit, be nane feared tae tak Mary your trystit wife intil your hame; the bairn
she's cairriein is o the Halie Spirit. She will beir a son, an the name ye ar tae gie him is Jesus, for he will sauf
his fowk frae their sins.'
Aa this happent at the wurd spokken bi the Lord throu the Prophet micht be fufilled:
Behaud, the virgin will bouk an beir a son, an they will caa his name Immanuel -
that is, ' God wi us'.
John Ch 14 vs 12-14
Trowth an atweill, I tell ye, him at believes in me will dae the things at I dae-ay!
an gryter things nor them; for I am gaein awa tae the Faither, an oniething at ye seek i my name, I
s' dae it, at the Faither may be glorified i the Son. Oniething at ye seek o me i my name,
I s' een dae it.
John Ch 15 vs 9 - 17
"As my Faither hes luved me, een sae hae I luved ye. Bide in my luve. Gin ye keep my commaundments,
ye will bide in my luve, een as I hae keepit my Faither's commaundments an bide in his luve.
Aa this I hae said tae ye at my joy may be yours, an at your joy may be naeweys mank.
This is my commaundment: luve ilk ither, as I hae luved ye. The grytest luve o aa is the luve o the man at lays
doun his life for his friends. Ye ar my friends, gin ye dae what I commaund ye. I caa ye servans nae mair, for
a servan kens nane what his maister is adaein: I hae caa'd ye friends, because I hae
looten ye ken aa at my Maister hes tellt me. Ye haena waled me, I hae waled ye; an I hae appointit ye tae
gae an beir frute, frute at will laist, sae at my Faither may gie ye aathing ye
seek o him. This is the commaundment I gie ye : luve ilk ither."
|
|